skip to main (ir a principal) |
skip to sidebar (ir al sidebar)
"Hosla Ho Is Qadar" by Nazar
Hosla ho iss qadar jo azm ko hasil kare
Ladkhada jate hain aksar log kuchh doori ke baad
Jo bhi ghor-o-fikr ho, ho qabal safar-e-daraz
Hona hayel waswasa ghar se nikal jane ke baad
Khwab ho to Khwab ki tabeer ki tadbeer ho
Roz ho jaddo-jahad shab ke mansoobe ke baad
Ho jahan ki hasratein shamil teri hasrat mein youn
Phir na ho koi juda tere qareeb aane ke baad
Kyon rahe manzil wahi jo thi aghaz-e-safar
Ho nigahein zabar pe zeyr mil jane ke baad
Zindagi hai aarzoo hai khwab tu bhi chand dekh
Kaun kya dekhe hai phir aankh lag jane ke baad
Poet: Nazar
"Hawaon K Hath Ek Arman Bheja Hai"
Hawaon K Hath Ek Arman Bheja Hai
Roshni K Zariye Ek Paigham Bheja Hai
Fursat Milay To Qabool Ker Lena
Is Nacheez Ne Piyara Sa Salam Bheja Hai
"Shayad Tu Kabhi Pyasa Meri Taraf" by Ahmad Faraz
Shayad Tu Kabhi Pyasa Meri Taraf Laut Aaye ‘Faraz’
Aankho’n Main Liye Phirta Hoon Darya Teri Khatir
Poet: Ahmad Faraz
"Ranjish hii sahii, dil hii dukhaane ke liye aa" by Ahmad Faraz
ranjish hii sahii, dil hii dukhaane ke liye aa
aa phir se mujhe chhoD ke jaane ke liye aa
kuchh to mere pindaar-e-mohabbat* kaa bharam rakh
tuu bhii to kabhii mujhko manaane ke liye aa
pahle se maraasim* na sahii, phir bhii kabhii to
rasm-o-rah-e-duniaa hi nibhaane ke liye aa
kis kis ko bataayenge judaai ka sabab ham
tuu mujh se Khafaa hai, to zamaane ke liye aa
ek umar se huuN lazzt-e-giryaa* se bhii mahruum
ae raahat-e-jaaN mujhko rulaane ke liye aa
ab tak dil-e-Khushfaham ko tujh se haiN ummiideN
yah aakhirii shamaeN bhii bujhaane ke liye aa
Poet: Ahmad Faraz
"Is se pahle ki bewafa ho jaayen" by Ahmad Faraz
is se pahle ki bewafa ho jaayeN
kyuuN na aye dost ham judaa ho jaayeN
tuu bhii hiire se ban gayaa patthar
ham bhii kal jaane kyaa se kyaa ho jaayeN
ham bhii majbuuriyoN ka uzr kareN
phir kahiiN aur mubtilaa ho jaayeN
ab ke gar tuu mile to ham tujhse
aise lipTeN terii qabaa ho jaayeN
bandagii hamne chhoD dii Faraaz
kyaa kareN log jab Khudaa ho jaayeN
Poet: Ahmad Faraz
"Shab-e-vasl thii chaandnii kaa samaaN thaa" by Haider Ali Aatish
shab-e-vasl thii chaandnii kaa samaaN thaa
baGal meN sanam thaa, Khudaa meherbaaN thaa
voh shab thii ki thii roshnii jismeN din kii
zamiiN par se ek nuur taa aasmaaN thaa
nikaale the do chaaNd usne muqaabil
voh shab sub'h-e-jannat ka jis pe gumaaN thaa
uruusii kii shab kii halaavat thii haasil
faraHnaak thii ruuH, dil shaadmaaN thaa
bayaaN khwaab kii tarah jo kar rahaa hai
ye qissa hai jab kaa ki Aatish javaaN thaa
Poet: Haider Ali Aatish
"Ye aarzoo thi tujhe gul ke rubaru karte " by Haider Ali Aatish
Ye aarzoo thi tujhe gul ke rubaru karte
ham aur bulbul-e-betaab guftguu karte
payaambar na mayassar hua, to Khuub huaa
zubaan-e-Ghair se kyaa sharaH-e-aarzuu karte
meri tarah se mah-o-mahar bhii haiN aavaara
kisii habiib kii ye bhi haiN justujuu karte
jo dekhte terii zanjeer-e-zulf kaa aalam
asiir hone ki aazaad aarzuu karte
na puuchh aalam-e-bargashta taala'aii Aatash
barastii aag, jo baraaN ki aarzuu karte
Poet: Haider Ali Aatish
